മൂഷിക സ്ത്രീ വീണ്ടും മൂഷിക സ്ത്രീ - അഥവാ കേശപുരാണം

കോളേജില്‍ പഠിക്കുന്ന കാലത്തൊക്കെ എളുപ്പമായിരുന്നു. മാസത്തിലൊരിക്കല്‍ മുടി വെട്ടും. ആഴ്ചയിലൊരിക്കല്‍ താടി വടിക്കും. ആകെ രണ്ടു കോലങ്ങള്‍ മാത്രം - മുടി വെട്ടാത്ത കോലവും മുടി വെട്ടിയ കോലവും അഥവാ താടി വടിക്കാത്ത കോലവും താടി വടിച്ച കോലവും. റാഗിംഗ് കാരണം കോളേജില്‍ ഒന്നാം വര്‍ഷം മീശ വടിക്കേണ്ടി വന്നതൊഴിച്ചാല്‍ ഇത്രയൊക്കെ വിശേഷങ്ങള്‍ പറയാനുള്ളൂ.


അവസാന വര്‍ഷം എടുത്ത പടമാണ്, ഇത്. ബെംഗളൂരു വന്നതില്‍ പിന്നെയാണ് മടി പിടിച്ചു തുടങ്ങിയത്. ആദ്യം താടി വടിക്കാന്‍. കുറച്ചു താടി വന്നു കഴിഞ്ഞപ്പോള്‍ ഒരു ജാഡ ആയിക്കോട്ടെ എന്ന് വിചാരിച്ചു ... ഊശാന്‍ താടി ഒന്നു പരീക്ഷിച്ചു. അതായിരുന്നു തുടക്കം :)

സല്‍മാന്‍ ഖാന്‍, ജോണ്‍ അബ്രഹാം തുടങ്ങി എല്ലാവരും മുടി നീട്ടിയത് കണ്ടപ്പോഴാണ് ഇതൊന്നു നോക്കിയാലോ എന്ന് തോന്നിയത്. പക്ഷെ ഇവരുടെയൊക്കെ മുടി വടി പോലെ നില്‍ക്കുമ്പോള്‍ എന്‍റെ മുടി എന്ത് ചെയ്താലും ചുരുണ്ടു കൂടി കാടു പിടിച്ചു കിടക്കും. വെള്ളമൊഴിക്കുകയും കെട്ടി വെക്കുകയും ഒക്കെ ചെയ്തു നോക്കി. നോ രക്ഷ. അവസാനം എന്‍റെ സ്ഥിരം ബാര്‍ബര്‍ ആണ് ഐഡിയ പറഞ്ഞു തന്നത് ... മുടി കുറച്ചധികം നീണ്ടു കഴിഞ്ഞാല്‍ പിന്നെ ശരിക്കും കെട്ടി വെക്കാം. അത് വരെ ഇത് കൊണ്ടു നടക്കാനുള്ള തൊലിക്കട്ടി ഉണ്ടായാല്‍ മതി. അത് കൊള്ളാമല്ലോ എന്നെനിക്കും തോന്നി. അങ്ങനെ മുടി നീട്ടി, ഒരു ആറ് മാസം കൊണ്ടു മുടി അത്യാവശ്യം കെട്ടി വെക്കാന്‍ പാകമായി. ഇതിനിടക്ക് അണ്ണിയനില്‍ വിക്രമിന്‍റെ മുടി കണ്ടപ്പോള്‍ ഒന്നു കളറും അടിച്ചു :)


ഈ മുടി നേരെയാക്കുന്ന വിദ്യയും അതിനിടക്ക് (ഇതും ആ ബാര്‍ബര്‍ ചേട്ടന്‍ പറഞ്ഞു തന്നതാണ്) പിടി കിട്ടി. ഒരു ക്രീം ഉണ്ട് - അത് പുരട്ടി കുറച്ചു നേരം വെച്ചാല്‍ മതി പോലും. ജര്‍മന്‍ സായിപ്പ് കണ്ടു പിടിച്ചതാണ് ഈ സാധനം. ആദ്യം ഈ ചെട്ടനെക്കൊണ്ടു തന്നെ അത് ചെയ്യിച്ചു. പിന്നെ ഇമ്മിണി കാശ് മുടക്കി വേറൊരു സ്ഥലത്തു വെച്ചും ചെയ്തു. അപ്പോഴത്തെ കോലം ആണ് ഇത്.


ഇങ്ങനെ ചില നാരികളെ വരെ തോല്‍പ്പിക്കുന്ന കേശഭാരവും പേറി നടക്കുമ്പോഴാണ് ഒരു വിസയുടെ പേരില്‍ ഇടിത്തീ തലയില്‍ വീണത്‌. ചെന്നയില്‍ സായിപ്പിനെ കാണാന്‍ പോവുമ്പോള്‍ മുടി വെട്ടിയേ തീരൂ എന്ന് പലരുടെയും അന്ത്യശാസനം കിട്ടിയപ്പോള്‍ അവസാനം അത് സംഭവിച്ചു! ഊഴം കാത്തു ബാര്‍ബര്‍ ഷാപ്പില്‍ ഇരിക്കുമ്പോള്‍ എടുത്തതാണ് ഈ പടം.



മൊട്ടത്തല മാത്രമെ ഇനി പരീക്ഷിക്കാന്‍ ബാക്കിയുള്ളു‌ എന്ന് തോന്നിയതിനാല്‍ ഇടക്ക് അതും ഒന്നു നോക്കി. വീണ്ടും മുടി വന്നപ്പോള്‍ വെട്ടാന്‍ നിന്നില്ല. അമേരിക്ക യാത്ര അപ്പോഴേക്കും കഴിഞ്ഞതിനാല്‍ ആരും അന്ത്യശാസനവും തന്നില്ല. എന്നാല്‍ പിന്നെ അതവിടെ ഇരുന്നോട്ടെ എന്ന് ഞാനും വിചാരിച്ചു. ഇപ്രാവശ്യം മുടി കോലന്‍ ആക്കണോ, കളര്‍ അടിക്കാനോ ഒന്നും മിനക്കെട്ടില്ല. അവസാനം ഒരു കുരുവിക്കൂട് തലയില്‍ വളര്‍ന്നു വലുതായി ...


ദാ ... ഇത്ര വരെയായി. അവസാനം നാട്ടുകാരും, ബന്ധുക്കളും കു‌ട്ടുകാരും എല്ലാവരും ഇടപെട്ടു. വെട്ടേണ്ടി വന്നു. കഴിഞ്ഞാഴ്ച ആയിരുന്നു ആ പുണ്യകര്‍മം. ആദ്യത്തെ ഒരു റൌണ്ട് കഴിഞ്ഞിട്ടും മുടി ഒതുങ്ങാത്തതിനാല്‍ ഇന്നലെ ഒരിക്കല്‍ കു‌ടി പോയി വെട്ടി ...


അങ്ങനെ മു‌ഷിക സ്ത്രീ വീണ്ടും മു‌ഷിക സ്ത്രീ. മലയാളത്തില്‍ പറഞ്ഞാല്‍ എനിക്ക് പിന്നെയും മനുഷ്യക്കോലം വന്നു :) ഒരു പത്തു വയസ്സ് കുറഞ്ഞോ എന്നൊരു സംശയം :) നിങ്ങള്‍ക്കും അങ്ങിനെ തോന്നിയോ?

പീ എസ്: ഈ പല വിധ അവതാരങ്ങളുടെയും ഒരു വിപുലമായ ശേഖരം ഇവിടെ കിട്ടും.

ഓണദിന യാത്ര

ഒരു മാതിരി ഉച്ചയായപ്പോള്‍ എനിക്കു ശരിക്കും സംശയമായി - ഇനിയിപ്പോ വീട്ടില്‍ പോവുന്ന കാര്യം കഷ്ടം തന്നെ. ഓണത്തിന് നാട്ടിലേക്കുള്ള ബസ്സിലൊക്കെ കൊള്ളാവുന്നതില്‍ കു‌ടുതല്‍ ആള്‍കാര്‍ ഉണ്ടാവും എന്ന് പണ്ടു മുതലേ അറിയാവുന്നത് കൊണ്ടു ടിക്കറ്റൊന്നും ഞാന്‍ ആദ്യമേ എടുത്തില്ല. വേര്‍സ ഉള്ളപ്പോ എന്തിനാ ബസ്സ് ടിക്കറ്റ് :) പക്ഷെ ഒരു 3 മണിക്ക് മുന്നേ ഇറങ്ങിയാലെ അര്‍ദ്ധരാത്രിക്കെങ്കിലും വീട്ടിലെത്തൂ... ഇതിപ്പോ പണി തീരുന്ന ഒരു ലക്ഷണവും കാണുന്നില്ല ... പിന്നെങ്ങനെ പോവും?

ഏതാണ്ട് രാത്രി 7.30 ആയപ്പോള്‍ ഒരദ്ഭുതം സംഭവിച്ചു. ശരിയാവില്ല എന്ന് വിചാരിച്ച കാര്യം അങ്ങോട്ട് ശരിയായി. മാനേജര്‍ക്ക് ഒരു ഫോണ്‍ കാള്‍, കുറച്ചു മെയിലുകള്‍, രാത്രി ഭക്ഷണം എല്ലാം കഴിഞ്ഞപ്പോള്‍ സമയം 9 മണി. ബെംഗളൂരു ട്രാഫിക് അല്ലെ. നഗരപരിധി വിടുമ്പോള്‍ 10.30 ആയി. പിന്നെ കത്തിച്ചു വിട്ടു. 11 മണിക്ക് രാമനഗരം, 11.30 മാണ്ഡ്യ. രാത്രി അവിടെയാണ് തങ്ങിയത്. 3.30 ആയപ്പോള്‍ എണീച്ചു. 4 മണിക്ക് വീണ്ടും റോഡില്‍.

മൈസൂര്‍ കഴിഞ്ഞു ഗുണ്ടുല്‍പേട്ട് എത്തിയപ്പോഴേക്കും നേരം വെളുത്തു. ബന്ദിപൂര്‍ വന്യ ജീവി സങ്കേതത്തില്‍ എത്തിയപ്പോള്‍ കുറച്ചു നേരം നിര്‍ത്തിയിട്ടു. നല്ല വിശപ്പ് ... റംസാന്‍ മാസത്തിലെ ഓണദിനം ആയത്‌ കാരണം ഹോട്ടല്‍ ഒന്നും തുറക്കില്ല എന്നുറപ്പ്. അത് കൊണ്ടു തന്നെ ഒരു പകുതി വത്തക്കയും (ഇതെന്താണെന്നറിയാത്തവര്‍ക്ക് വേണ്ടി ... പരിഭാഷ: വാട്ടര്‍ മെലണ്‍) ഒരു കത്തിയും കരുതിയിരുന്നു. അത് കുറച്ച് അകത്താക്കി. അപ്പോഴേക്കും കുറച്ചു കൂടെ വെളിച്ചം വന്നു. പിന്നെ യാത്ര തുടര്‍ന്നു ... ഇത്തവണ കുറച്ചു പതുക്കെ ...

കാലങ്ങളായി ഞാന്‍ ബെംഗളൂരു നിന്നും കോഴിക്കോട്ടേക്ക് ഡ്രൈവ് ചെയ്തു വരുന്നു. കുറഞ്ഞത് ഒരമ്പത് തവണയെങ്കിലും. ആദ്യമൊക്കെ സ്ഥിരമായി ബസ്സില്‍ ആയിരുന്നു. ഒരിക്കല്‍ ബൈക്കില്‍. ഇപ്പൊ സ്ഥിരമായി കാറില്‍ തന്നെ. കുറച്ചു സമയം അധികം വേണമെങ്കിലും ഇതു തന്നെ സൗകര്യം. നേരത്തെ പ്ലാന്‍ ചെയ്തു ടിക്കറ്റ് എടുക്കേണ്ട ... ഇടക്കൊന്നു മൂത്രം ഒഴിക്കാന്‍ തോന്നിയാല്‍ ഡ്രൈവറുടെ ദയ കാത്തു നില്‍ക്കേണ്ട ... ഇതിലൊക്കെ പ്രഥാനമായി വഴി നിറയെ നല്ല കാഴ്ചകള്‍ ... ബെംഗളൂരു - മൈസൂര്‍ റോഡ് ഇപ്പോഴൊരു വളരെ നല്ല നാല് വരിപ്പാതയാണ്. ഒരു രാമനഗരം കഴിഞ്ഞാല്‍ പിന്നെ ഗുണ്ടുല്‍പേട്ട് വരെ രണ്ടു വശത്തും പാടങ്ങള്‍ ... നെല്ല് അല്ലെങ്കില്‍ കരിമ്പ്‌. ഗുണ്ടുല്‍പേട്ട് ഒരു മനോഹരമായ സ്ഥലമാണ്. മലകളും, പച്ചപ്പും, പൊയ്കകളും, പൂക്കളും നിറഞ്ഞ ഒരു സുന്ദരമായ ഗ്രാമം. ഇതു കഴിഞ്ഞാല്‍ ബന്ദിപൂര്‍ വന്യ ജീവി സങ്കേതം ... കൊമ്പനാന മുതല്‍ അപൂര്‍വ തരം പക്ഷികള്‍ വരെ ... പലതും. കാടു കഴിഞ്ഞാല്‍ പിന്നെ നാട് ... വയനാട്. ഈ നാടിന്‍റെ ഭംഗിയെ കുറിച്ചു ഞാന്‍ പറയണോ? വയനാട് കഴിഞ്ഞാല്‍ ചുരം! ചുരുക്കത്തില്‍ ഒരു ക്യാമറ കയ്യിലുണ്ടെങ്കില്‍ നിര്‍ത്താനെ സമയം കാണു :)


ഇന്നു ബന്ദിപൂരില്‍ കുറച്ചു മാനുകളേയും കുരങ്ങമ്മാരെയും മാത്രമെ കണ്ടുള്ളൂ. മാനുകളൊക്കെ കണ്ടപ്പോഴേ ഓടി രക്ഷപ്പെടുകയും ചെയ്തു. വെളിച്ചവും അത്രക്കില്ലാഞ്ഞത് കൊണ്ടു നല്ല പടങ്ങളൊന്നും കിട്ടിയില്ല. എന്നാലും കിട്ടിയത് ചേര്‍ക്കുന്നു :)



7 മണി ആയപ്പോള്‍ കേരള - കര്‍ണാടക അതിര്‍ത്തിയിലെത്തി. പിന്നെ സുല്‍ത്താന്‍ ബത്തേരി, മീനങ്ങാടി ഒക്കെ പെട്ടെന്ന് കഴിഞ്ഞു. 8 മണിക്ക് കല്പറ്റ. 8.30 ആയപ്പോള്‍ ചുരത്തിനടുത്തും. അവിടുന്നാണ് മു‌ന്നാമത്തെ ചിത്രം.


മഴയായി കഴിഞ്ഞാല്‍ പിന്നെ ചുരത്തില്‍ ഒരു നൂറു വെള്ളച്ചാട്ടങ്ങള്‍ കാണും. പല സ്ഥലത്തും നിര്‍ത്തി പടങ്ങളെടുത്തു. അതിലൊരെണ്ണം ആണ് നാലാമത്തേത്. ഇടക്ക് വിശപ്പ് കൂടിയപ്പോള്‍ ബാക്കിയുള്ള വത്തക്കയും തീര്‍ത്തു :) താഴെ ഏത്താറായപ്പോള്‍ ഞാന്‍ ഇതു വരെ ശ്രദ്ധിച്ചിട്ടില്ലാത്ത ഒരു അരുവി കണ്ടു. അതിന്‍റെ ചിത്രങ്ങള്‍ ഇവിടെ പോസ്റ്റിയിട്ടുണ്ട്.

ചുരം ഇറങ്ങിയപ്പോഴേക്കും സമയം 9.30. മഴ പെയ്തതിനാല്‍ റോഡ് ഒക്കെ നനഞ്ഞിരിക്കുന്നു. അതിനാല്‍ സൂക്ഷിച്ചാണെങ്കിലും ഒട്ടും വേഗം കുറക്കാതെ ബാക്കി യാത്ര. താമരശ്ശേരി, കൊടുവള്ളി, കുന്ദമംഗലം, കാരന്തൂര്‍, മലാപ്പറമ്പ് ഒക്കെ പെട്ടെന്ന് കഴിഞ്ഞു. ഈസ്റ്റ് ഹില്‍ വഴി കണ്ണൂര്‍ റോഡിലേക്ക്. 10.30 ആയപ്പോഴേക്കും വീട്ടിലെത്തി. ആദ്യം അമ്മയുണ്ടാക്കിയ ഇഡ്ഡലിയും സാമ്പാറും :) ഏട്ടത്തിയമ്മ പുക്കളം ഇട്ടു തീര്‍ന്നിട്ടില്ല ... മുറ്റത്ത്‌ മാവേലി വേഷങ്ങള്‍ ... ഓണം തുടങ്ങിയിട്ടെയുള്ളു :)

എല്ലാര്‍ക്കും ഓണദിനാശംസകള്‍!